من نحن
«سريرة» علامة تشغلها مؤسسة سريرة النفس، الرقم الوطني الموحد 7055524909، وهي الجهة المسؤولة عن بياناتك. للتواصل: sareera@sareera.sa
إجابات المقاييس
تتصحّح داخل متصفحك. ما توصلنا وما نحفظها، سواء عندك حساب أو لا. وما نحفظ أي بيانات عن عملائك.
تصميمك في الأدوات
تفضيلات التصميم والشعار تُحفظ في متصفحك فقط. ما نرفع شعارك ولا نحفظه عندنا، وتقدر تشيله من زر «رجّع تصميم سريرة».
الاستخدام بدون نت
يحفظ متصفحك نسخة من صفحات سريرة العامة وملفاتها عشان تفتحها بدون نت. ما فيها شي كتبته أنت ولا توصلنا منها أي بيانات، وتقدر تمسحها من إعدادات المتصفح.
وش نحفظ لو سجّلت، وليش، وإلى متى
| البيان | ليش | إلى متى |
|---|---|---|
| الإيميل | للدخول لحسابك | لين تحذف حسابك |
| كلمة المرور (لو سجّلت بالإيميل وكلمة مرور) | للدخول لحسابك | تنحفظ مشفّرة عند Supabase، وما نقدر نطّلع عليها |
| الاسم والتخصص (اختياري) | يظهر في حسابك | لين تحذف حسابك |
| المفضلة | ترجع لمقاييسك وأدواتك بسرعة | لين تحذفها أو تحذف حسابك |
| قوالب خططي | قوالب خطط عامة تحفظها من «صمّم خطتك» وترجع لها من أي جهاز: المشكلة والأهداف والتدخلات وترتيب الجلسات. ما ينحفظ معها رمز العميل ولا الدرجات، ولا تكتب فيها اسم عميل أو أي معلومة تعرّفه | لين تحذفها أو تحذف حسابك |
| رقم التصنيف المهني (اختياري) | نتحقق منه في موقع الهيئة السعودية للتخصصات الصحية، ونرجع له لما ينتهي الترخيص عشان نتأكد إنه تجدد. ما يظهر لأحد غيرك | لين تحذف حسابك لو تم التوثيق، ولو ما تم ينحذف خلال ٣٠ يوم |
| الاشتراك (حالته وتواريخه، وآخر ٤ أرقام من البطاقة، ورمز البطاقة من بوابة الدفع) | نفتح لك المحتوى المدفوع ونجدد اشتراكك | لين تحذف حسابك |
| سجل المدفوعات (المبلغ والتاريخ ورقم العملية) | الفواتير والزكاة والضريبة | ٦ سنوات من تاريخ العملية، حتى لو حذفت حسابك |
| وقت موافقتك ونسخة السياسة وشروط الاشتراك | نثبت موافقتك | لين تحذف حسابك |
لو دخلت بحساب Google، ناخذ منه إيميلك واسمك بس.
الدفع
الدفع يتم عند بوابة الدفع Moyasar المرخصة من البنك المركزي السعودي. رقم بطاقتك يدخل عندهم مباشرة وما يوصلنا، وهم يعطوننا رمز نستخدمه للتجديد الشهري. وتعالج البوابة بيانات الدفع نيابة عنا حسب سياستها.
تنبيه الإطلاق
لو كتبت إيميلك في صفحة «قريبًا»، نحفظه بس عشان نرسل لك إيميل واحد يوم الإطلاق، وبعدها نحذف القائمة كاملة خلال ٣٠ يوم. ما نستخدمه لشي ثاني.
لو راسلتنا من صفحة التواصل أو بالإيميل
| البيان | ليش | إلى متى |
|---|---|---|
| الإيميل والاسم (الاسم اختياري) ونص رسالتك | نرد عليك ونتابع مقترحك أو شكواك | سنة بعد إغلاق الطلب، وبعدها تنحذف |
الرسائل اللي توصل على إيميلنا sareera@sareera.sa تنحفظ عند Microsoft (Outlook)، وخوادمه خارج المملكة. ونحذفها بعد سنة من إغلاق الطلب.
لا تكتب في الرسالة أي معلومات عن عملائك أو تفاصيل صحية.
الإيميلات اللي نرسلها لك
إيميلات الحساب، مثل رابط التفعيل وإعادة كلمة المرور وتنبيه نهاية التجربة، نرسلها عن طريق مزوّد الإرسال Resend، وخوادمه خارج المملكة. ما نرسل فيها إلا إيميلك ونص الرسالة، ويحذف المزوّد سجلاتها بعد مدة قصيرة.
المساعد الآلي
أسئلتك للمساعد الآلي في صفحة التواصل تنرسل لمزوّد النموذج Anthropic في الولايات المتحدة عشان يجهز الرد، ويعالجها نيابة عنا. ما نحفظ المحادثة عندنا، وتنتهي لما تقفل الصفحة. وقد يحتفظ المزوّد بها مدة محدودة حسب سياسته، ثم يحذفها. وما نرسل له بيانات حسابك أو رقم تصنيفك. لا تكتب له أي معلومات عن عملائك.
وين تنحفظ
بيانات الحساب والرسائل عند مزوّد الخدمة Supabase، في خوادم مشفّرة في فرانكفورت، ألمانيا. Supabase يعالج البيانات نيابة عنا وما يستخدمها لغرض ثاني. نتعامل معها حسب نظام حماية البيانات الشخصية في المملكة.
وش ما نسويه
- ما نبيع بياناتك وما نشاركها مع أحد.
- ما نرسل لك إعلانات.
حقوقك
- تشوف بياناتك وتعدّلها من صفحة حسابي.
- تحذف حسابك وكل بياناته من نفس الصفحة بضغطة، وهذا يعتبر سحب لموافقتك. تبقى نسخة في النسخ الاحتياطية لمدة أقصاها ٧ أيام، وبعدها تنحذف تلقائيًا.
- لو عندك شكوى، راسلنا أول. ولك الحق ترفعها للهيئة السعودية للبيانات والذكاء الاصطناعي (سدايا).
التعديلات
لو غيّرنا هذي السياسة نرفع رقم النسخة ونطلب موافقتك من جديد في صفحة حسابك.